ໃນຕອນເຊົ້າວັນທີ 4 ມີນາ 2022 ທີ່ຜ່ານມາ ອົງການປົກຄອງແຂວງຈໍາປາສັກ ນໍາໂດຍທ່ານ ປອ. ວິໄລວົງ ບຸດດາຄຳ, ເຈົ້າແຂວງຈໍາປາສັກ ໄດ້ນໍາພາຄະນະເດີນທາງມາຢ້ຽມຢາມ ເຂດພັດທະນາ ກວມລວມ ໄຊເຊດຖາ ໂດຍມີ ທ່ານ ສອນປະເສີດ ດາລາວົງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ, ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ທ່ານ ໂກວ ກວາງຫຼຽງ ຮອງອຳນວຍການ ບໍລິສັດ ຮ່ວມທຶນລາວ-ຈີນ ຈຳກັດ, ທ່ານ ເຝີງ ຫຼິນ ຜູ້ອຳນວຍການ ບໍລິສັດ ບໍລິຫານທຸລະກິດໄຊເຊດຖາ(ລາວ) ຈຳກັດ, ທ່ານ ນາງ ແສງອາລຸນທອນ ບຸບຜາສວັນ ຜູ້ຊ່ວຍອຳນວຍການ ພ້ອມດ້ວຍບັນດາບັນດາຄະນະທີ່ກ່ຽວຂ້ອງເຂົ້າຮ່ວມໃນພິທີຮັບດັ່ງກ່າວ.

     ໃນໂອກາດນີ້ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງຈັນ ໄດ້ຂຶ້ນກ່າວລາຍງານ, ກ່ຽວກັບສະພາບ ການພັດທະນາຂອງເຂດເສດຖະກິດພິເສດໃນນະຄອນຫຼວງວຽງຈັນ ເຊິ່ງມີເນື້ອໃນສຳຄັນໂດຍຫຍໍ້ ດັ່ງນີ້: ປະຈຸບັນ ນະຄອນຫຼວງວຽງຈັນ ມີເຂດເສດຖະກິດພິເສດທັງໝົດ 05 ເຂດຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດບືງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລກຊິດສະຕິກ ນະຄອນຫຼວງວຽງຈັນ. ເຊິ່ງມີເນື້ອທີ່ຂອງເຂດມີລວມທັງໝົດ 2,360 ເຮັກຕາ, ທັງ 05 ເຂດ ແມ່ນມີເປົ້າໝາຍການພັດທະນາທີ່ ແຕກຕ່າງກັນ, ຍົກຕົວຢ່າງເຂດພັດທະນາກວມລວມໄຊເຊດຖາ ເປົ້າໝາຍການພັດທະນາກໍ່ແມ່ນເພື່ອສ້າງເປັນເຂດພັດທະນາອຸດສາຫະກຳຄົບວົງຈອນ ທີ່ຕິດພັນກັບການສ້າງເປັນຕົວເມືອງໃຫມ່ ໃນນະຄອນຫຼວງວຽງຈັນ, ທີ່ລວມມີເຂດທີ່ຢູ່ອາໃສ, ເຂດການຄ້າການບໍລິການ ແລະ ລະບົບການຂົນສົ່ງຄົບວົງຈອນ.

     ພາຍຫຼັງທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງຈັນ ໄດ້ຂື້ນກ່າວລາຍງານການພັດທະນາຂອງເຂດເສດຖະກິດພິເສດ ໃນນະຄອນຫຼວງວຽງຈັນແລ້ວ, ທາງຜູ້ພັດທະນາເຂດພັດທະນາກວມລວມໄຊເຊດຖາ ທ່ານ ນາງ ແສງອາລຸນທອນ ບຸບຜາສວັນ ຜູ້ຊ່ວຍອຳນວຍການ ບໍລິສັດ ຮ່ວມທຶນລາວ-ຈີນ ຈຳກັດ ຜູ້ພັດທະນາເຂດພັດທະນາກວມລວມໄຊເຊດຖາ ກໍ່ໄດ້ໃຫ້ກຽດຂຶ້ນກ່າວລາຍງານ ຄວາມຄືບໜ້າຂອງການພັດທະນາຂອງເຂດ ເຊີ່ງມີເນື້ອໃນສໍາຄັນໂດຍຫຍໍ້ດັ່ງນີ້:​ເຂດພັດທະນາກວມລວມໄຊເຊດຖາ ແມ່ນໂຄງການຮ່ວມທຶນ ລະຫວ່າງ ອົງການປົກຄອງນະຄອນຫຼວງວຽງຈັນຕາງໜ້າລັດຖະບານລາວ ແລະ ບໍລິສັດລົງທຶນຕ່າງປະເທດແຂວງຢູນນານທີ່ຂຶ້ນກັບກຸ່ມບໍລິສັດ ກໍ່ສ້າງ ແລະ ລົງທຶນ ແຂວງຢຸນນານ ຫຸ້ນສ່ວນຈໍາກັດ ຕາງໜ້າລັດຖະບານ ສປ ຈີນ, ເປັນເຂດທີ່ທັງສອງລັດຖະບານກໍານົດເປັນໂຄງການຮ່ວມມືລະດັບຊາດ, ເປັນໂຄງການທີ່ເປັນສັນຍາລັກມິດຕະພາບລະຫວ່າງສອງປະເທດ ລາວ-ຈີນ, ໄດ້ຮັບການເອົາໃຈໃສ່ ແລະ ໃຫ້ການສະໜັບສະໜູນຈາກລັດຖະບານສອງຊາດ, ເປັນເຂດຮ່ວມມືເສດຖະກິດການຄ້າຕ່າງປະເທດຂອງສປຈີນແຫ່ງດຽວຢູ່ໃນລາວ,      ມາຮອດປະຈຸບັນເຂດພັດທະນາໄດ້ສໍາເລັດການພັດທະນາໄລຍະທີໜຶ່ງ ສໍາເລັດການກໍ່ສ້າງໂຄງລ່າງພື້ນຖານເປັນຕົ້ນ ຖະໜົນຫົນທາງ, ນໍ້າປະປາ, ໄຟຟ້າ, ການສື່ສານ, ຫ້ອງການພາສີ ແລະ ສິ່ງອໍານວຍຄວາມສະດວກອື່ນໆ. ປະຈຸບັນເຂດພັດທະນາກໍາລັງສຸມໃສ່ກໍ່ສ້າງເຂດການຄ້າການທ່ອງທ່ຽວ ແລະ ເຂດຕົວເມືອງໃຫມ່ນະຄອນຫຼວງວຽງຈັນຂອງໄລຍະທີສອງ ເພື່ອເປັນການປັບປຸງສິ່ງອໍານວຍຄວາມສະດວກຂອງໂຄງລ່າງພື້ນຖານ. ມາຮອດປະຈຸບັນເຂດພັດທະນາໄດ້ມີການລົງທຶນໄປແລ້ວທັງໝົດ 1,3 ຕື້ໂດລາສະຫະລັດໃນນີ້ລົງທຶນໃນໂຄງລ່າງພື້ນຖານປະມານ 600 ລ້ານໂດລາສະຫະລັດ, ມູນຄ່າລົງທຶນຂອງວິສາຫະກິດທີ່ລົງທຶນຢູ່ໃນເຂດລົງທຶນປະມານ 700 ລ້ານໂດລາສະຫະລັດ. ປະຈຸບັນ ເຂດພັດທະນາກວມລວມໄຊເຊດຖານະຄອນຫຼວງວຽງຈັນມີຫົວໜ່ວຍວິສາຫະກິດທີ່ໄດ້ເຊັນສັນຍາທັງໝົດ 107 ບໍລິສັດ, ໃນນີ້ມີ 51 ບໍລິສັດທີ່ໄດ້ເລີ່ມທໍາການຜະລິດແລ້ວ, 56 ບໍລິສັດແມ່ນກໍາລັງກະກຽມເບື້ອງຕົ້ນ ແລະ ກໍາລັງດໍາເນີນການກໍ່ສ້າງ ເຊິ່ງເປັນນັກລົງທຶນທີ່ມາຈາກ 7 ປະເທດ ແລະ ພື້ນທີ່ເຊັ່ນ: ປະເທດຈີນ, ໄທ, ຍີ່ປຸ່ນ, ມາເລເຊຍ, ສິງກະໂປ, ລາວ ແລະ ສະຫະລັດອາເມລິກາ. ລວມມີບໍລິສັດທີ່ສໍາຄັນຄື: ສໍານັກງານໃຫຍ່ຂອງບໍລິສັດທາງລົດໄຟລາວຈີນ, ກຸ່ມບໍລິສັດຄວາມຫວັງໃຫມ່ ເປັນໂຮງງານຜະລິດຫົວອາຫານທີ່ໃຫຍ່ ແລະ ມີຄຸນະພາບ, ກຸ່ມບໍລິສັດໂຮຢາ ເປັນບໍລິສັດທີ່ໃຫຍ່ ແລະ ມີຊື່ສຽງ ຂອງປະເທດຍີ່ປຸ່ນ ເຊິ່ງຈະນໍາໃຊ້ແຮງງານ ປະມານ 4500 ຄົນ, ເຂດພັດທະນາຂອງພວກເຮົານັບແຕ່ມື້ເລີ່ມຕົ້ນໂຄງການເປັນຕົ້ນມາ, ພວກເຮົາໄດ້ຖືເອົາການປົກປັກຮັກສາສິ່ງແວດລ້ອມ ແລະ ເຂດຂຽວເປັນສໍາຄັນຕະຫຼອດມາ, ເຄົາລົບລະບຽບກົດໝາຍຂອງ ສປປ ລາວ, ເຄົາລົບນັບຖືຮີດຄອງປະເພນີຂອງລາວ, ເນັ້ນໜັກດ້ານການປົກປັກຮັກສາສິ່ງແວດລ້ອມ ແລະ ປັບປຸງຊີວິດການເປັນຢູ່ຂອງປະຊາຊົນມາເປັນອັນດັບໜຶ່ງ.

     ມາເຖີງວາລະສຸດທ້າຍອັນສໍາຄັນ ເພື່ອໃຫ້ພິທີການລົງຢ້ຽມຢາມເຂດພັດທະນາຂອງ ທ່ານ ປອ. ວິໄລວົງ ບຸດດາຄຳ, ເຈົ້າແຂວງຈໍາປາສັກ ມີອົງປະກອບຄົບຖ້ວນສົມບູນ ທ່ານ ປອ. ວິໄລວົງ ບຸດດາຄຳ, ເຈົ້າແຂວງຈໍາປາສັກ ກໍ່ໄດ້ໃຫ້ກຽດຂື້ນກ່າວໃຫ້ທິດຊີ້ນໍາວຽກງານແກ່ເຂດພັດທະນາ ເຊີ່ງມີເນື້ອໃນສໍາຄັນໂດຍຫຍໍ້ດັ່ງນີ້: ການພັດທະນາຂອງເຂດພັດທະນາກວມລວມໄຊເຊດຖາ ແມ່ນມີການພັດທະນາແບບກ້າວກະໂດດ ແລະ ເປັນເຂດທີ່ພິເສດ ທີ່ເປັນແບບຢ່າງໃນການພັດທະນາ, ມື້ຄະນະຂອງພວກເຮົາ ຮູ້ສຶກສຸດທີ່ດີໃຈທີ່ໄດ້ມີໂອກາດລົງມາຢ້ຽມຢາມເຂດພັດທະນາກວມລວມໄຊເຊດຖາໃນຄັ້ງນີ້ ແລະ ຂໍໃຫ້ຮຽນເຊີນບັນດາທ່ານພ້ອມດ້ວຍຄະນະໄປຢ້ຽມຢາມ ແລະ ສຶກສາຄວາມເປັນໄປໄດ້ໃນການລົງທຶນຢູ່ແຂວງຈຳປາສັກຂອງພວກເຮົາ, ພວກເຮົາຍິນດີຕ້ອນຮັບ ແລະ ພວກເຮົາຍິນດີສະໜັບສະໜູນໃຫ້ມີການລົງທຶນຕາມແນວທາງຂອງພັກຂອງລັດ ຂອງສອງປະເທດ ລາວ-ຈີນ ທີ່ເປັນຄູ່ຮ່ວມສະຕາກຳ, ເຊິ່ງກໍ່ມີພຽງແຕ່ສອງປະເທດໃນໂລກເທົ່ານັ້ນທີ່ເປັນຄູ່ຮ່ວມສະຕາກັນ ນັ້ນກໍ່ຄື ສປ ຈີນ ແລະ ສປປ ລາວ.

ຄົ້ນຫາ

ປະຕິທິນ

December 2022
S M T W T F S
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 13

ຈຳນວນຜູ້ເຂົ້າຊົມວານນີ້ 65

ຈຳນວນຜູ້ເຂົ້າຊົມອາທິດນີ້ 437

ຈຳນວນຜູ້ເຂົ້າຊົມເດືອນນີ້ 206

ຈຳນວນຜູ້ເຂົ້າຊົມທັງໝົດ 108500

Currently are 7 guests and no members online