ງານສັບປະດາແຫ່ງຊາດ ດ້ານຄວາມປອດໄພທາງຫຼວງ ປະຈໍາປີ 2021 ພາຍໃຕ້ຫົວຂໍ້ “ຂັບຂີ່ປອດໄພຕ້ອງຮັດສາຍນິລະໄພ” ຈັດຂຶ້ນວັນທີ 3 ເມສາ 2021 ຢູ່ເດີ່ນພະທາດຫຼວງ ນະຄອນຫຼວງວຽງຈັນ ໂດຍການເປັນປະທານຂອງທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ທັງເປັນປະທານຄະນະກໍາມະການແຫ່ງຊາດດ້ານຄວາມປອດໄພທາງຫຼວງ ມີທ່ານ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີບັນດາທ່ານລັດຖະມົນຕີ ຮອງລັດຖະມົນຕີ ພະນັກງານ ທະຫານ ຕໍາຫຼວດ ນັກຮຽນ ນັກສຶກສາ ຕະຫຼອດຮອດພໍ່ແມ່ປະຊາຊົນທຸກຖ້ວນໜ້າ ເຂົ້າຮ່ວມ 700 ກວ່າຄົນ.

    ໂອກາດນີ້ ທ່ານ ວຽງສະຫວັດ ສີພັນດອນ ກ່າວວ່າ: ບັນຫາການເກີດອຸບັດເຫດທາງຫຼວງໃນທົ່ວໂລກ ໄດ້ມີອັດຕາການເພີ່ມຂຶ້ນຢ່າງໄວ ໂດຍສະເພາະໃນບັນດາປະເທດທີ່ກໍາລັງພັດທະນາ ເຊິ່ງສ້າງຄວາມສູນເສຍຕໍ່ຊີວິດ ແລະ ຊັບສິນ ລວມທັງສ້າງຄວາມເສຍຫາຍທາງດ້ານເສດຖະກິດ ແລະ ການພັດທະນາຂອງຫຼາຍປະເທດ ອີງຕາມການສະຫຼຸບລາຍງານຂອງອົງການອະນາໄມໂລກ ໃຫ້ຮູ້ວ່າ ໃນແຕ່ລະປີ ທົ່ວໂລກມີຜູ້ເສຍຊີວິດຈາກການເກີດອຸບັດເຫດທາງຫຼວງຫຼາຍກວ່າ 1,3 ລ້ານຄົນ ບາດເຈັບຫຼາຍກວ່າ 23 ລ້ານຄົນ ລວມມູນຄ່າການເສຍຫາຍ ກວມ 3% ຂອງ GDP ໂລກ ຫຼື ປະມານ 2,5 ພັນຕື້ໂດລາສະຫະລັດ.

 

     ສໍາລັບ ສປປ ລາວ ການເກີດອຸບັດເຫດທາງຫຼວງ ໄດ້ສ້າງຄວາມສູນເສຍທາງດ້ານຊີວິດ ແລະ ຊັບສິນຂອງປະຊາຊົນລາວໃນແຕ່ລະປີ ຄິດເປັນມູນຄ່າມະຫາສານ ຖ້າຄິດໄລ່ຕາມການກໍານົດຂອງອົງການອະນາໄມໂລກ ຜູ້ເສຍຊີວິດ 1 ຄົນ ຈະມີມູນຄ່າເທົ່າກັບ 70 ເທື່ອ ຂອງ GDP ແລະ ຜູ້ບາດເຈັບ 1 ຄົນ ເທົ່າກັບ 17 ເທື່ອຂອງ GDP ປັດຈຸບັນ ລາຍຮັບສະເລ່ຍຕໍ່ຫົວຄົນຕໍ່ປີຂອງ ສປປ ລາວ ປະມານ 2.500 ໂດລາສະຫະລັດ (ປະມານ 23 ລ້ານກີບ) ສະຖິຕິການເກີດອຸບັດເຫດຕາມການລາຍງານຂອງຕໍາຫຼວດຈະລາຈອນ ແຕ່ລະປີມີຜູ້ເສຍຊີວິດປະມານ 1.000 ຄົນ ແລະ ບາດເຈັບຫຼາຍກ່ວາ 8.000 ຄົນ ສະນັ້ນ ມູນຄ່າການສູນເສຍທາງເສດຖະກິດຈາກການເກີດບັດເຫດທາງຫຼວງ ຈະມີຫຼາຍກວ່າ 500 ລ້ານໂດລາ (ປະມານ 4.697 ຕື້ກີບ) ຕໍ່ປີ.

 

    ຍ້ອນເຫັນໄດ້ຄວາມສໍາຄັນຕໍ່ບັນຫາດັ່ງກ່າວ ອົງການສະຫະປະຊາຊາດຈຶ່ງໄດ້ມີມະຕິ ສະບັບເລກທີ A/RES/60/5 ລົງວັນທີ 26 ຕຸລາ 2005 ກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ ໂດຍມອບໝາຍໃຫ້ຫ້ອງການອົງການສະຫະປະຊາຊາດ ແລະ ອົງການອະນາໄມໂລກປະຈໍາພາກພື້ນ ສົມທົບກັນຈັດສັບປະດາຄວາມປອດໄພທາງຫຼວງສາກົນຂຶ້ນ ໂດຍຈັດໃຫ້ມີກິດຈະກໍາຕ່າງໆເພື່ອຍົກສູງສະຕິຕໍ່ຄວາມປອດໄພທາງຫຼວງ ເຊິ່ງມາຮອດປັດຈຸບັນ ໄດ້ຈັດມາແລ້ວ 5 ຄັ້ງ ແລະ ແຕ່ລະປີ ແຕ່ລະປະເທດ ສາມາດເລືອກເອົາ ຫົວຂໍ້ທີ່ເໝາະສົມກັບສະພາບຂອງປະເທດຕົນເອງ.

    ພ້ອມດຽວກັນນີ້ ກົດໝາຍວ່າດ້ວຍການຈະລາຈອນທາງບົກ ສະບັບປັບປຸງ ປີ 2012 ກໍໄດ້ກໍານົດໃຫ້ມີການຈັດສັບປະດາແຫ່ງຊາດດ້ານຄວາມປອດໄພທາງຫຼວງຂຶ້ນທຸກປີ ໃນອາທິດທໍາອິດຂອງເດືອນເມສາ ດັ່ງນັ້ນ ການຈັດງານດັ່ງກ່າວ ຈຶ່ງມີຄວາມໝາຍສໍາຄັນ ເພາະພວກເຮົາຈະໄດ້ພ້ອມໃຈກັນເຂັ້ມງວດຈັດຕັ້ງປະຕິບັດກົດໝາຍວ່າດ້ວຍການຈະລາຈອນທາງບົກແລ້ວ ຍັງໄດ້ປະຕິບັດພັນທະຂອງຕົນຕໍ່ສາກົນ ກໍຄືອົງການສະຫະປະຊາຊາດ ທີ່ ສປປ ລາວ ເປັນສະມາຊິກ.

    ການຈັດງານໃນຄັ້ງນີ້ ຈຸດປະສົງແມ່ນເພື່ອປະກອບສ່ວນຫຼຸດຜ່ອນການເກີດອຸບັດເຫດ ແລະ ການສູນເສຍຊີວິດຂອງຜູ້ໃຊ້ລົດໃຊ້ທາງຫຼວງໃນທົ່ວໂລກ ເວົ້າລວມ ເວົ້າສະເພາະແມ່ນການປະກອບສ່ວນຈັດຕັ້ງປະຕິບັດຍຸດທະສາດ ແລະ ແຜນນະໂຍບາຍຂອງພັກ ແລະ ລັດຖະບານຂອງ ສປປ ລາວ ໃນການຫຼຸດຜ່ອນຄວາມທຸກຍາກ ແລະ ປາກົດການຫຍໍ້ທໍ້ຂອງສັງຄົມ ໂດຍສະເພາະ ໃນດ້ານການຈະລາຈອນທາງບົກ ໃຫ້ຫຼຸດໜ້ອຍຖອຍລົງເທື່ອລະກ້າວ ນອກຈາກນັ້ນ ກໍເພື່ອເປັນການປຸກລະດົມສະຕິ ແລະ ປູກຈິດສໍານຶກກ່ຽວກັບຄວາມປອດໄພໃນການໃຊ້ລົດທາງຫຼວງ ທຸກເພດ ທຸກໄວ ທຸກຊັ້ນຄົນໃນສັງຄົມ ໃຫ້ເຫັນໄດ້ເຖິງໄພອັນຕະລາຍຂອງການລະເມີດກົດຈະລາຈອນ ເປັນຕົ້ນແມ່ນການຂັບຂີ່ລົດໄວ ການດື່ມສິ່ງມືນເມົາ ເມົາແລ້ວຂັບ ເຊິ່ງເປັນສາເຫດສ່ວນໃຫຍ່ຂອງການເກີດອຸບັດເຫດຕໍ່ການເສຍຊີວິດຂອງສັງຄົມ ຕໍ່ເສດຖະກິດ ແລະ ການພັດທະນາຂອງຊາດ.

    ການຈັດສັບປະດາແຫ່ງຊາດດ້ານຄວາມຄວາມປອດໄພທາງຫຼວງໃນແຕ່ລະປີ ແມ່ນເປັນສິ່ງຈໍາເປັນ ແລະ ມີຄວາມໝາຍສໍາຄັນ ທີ່ທຸກພາກສ່ວນກ່ຽວຂ້ອງ ທັງພາກລັດ ແລະ ເອກະຊົນ ຕ້ອງຊ່ວຍກັນຮ່ວມແຮງຮ່ວມໃຈປະກອບສ່ວນເຫື່ອແຮງ ວັດຖຸປັດໄຈ ຈັດງານສັບປະດາຄວາມປອດໄພທາງຫຼວງນີ້ຂຶ້ນໃຫ້ເປັນຂະບວນການຟົດຟື້ນ ແລະ ພ້ອມພຽງກັນປະຕິບັດກົດຈະລາຈອນຢ່າງເຂັ້ມງວດ ເພື່ອປົກປ້ອງຊີວິດ ແລະ ຊັບສິນຂອງໝົດທຸກຄົນ ສ່ວນຢູ່ບັນດາແຂວງໃນທົ່ວປະເທດ ກໍອາດຈະຈັດງານໃນມື້ທີ່ແຕກຕ່າງກັນ ແຕ່ຈຸດປະສົງ ແລະ ເປົ້າຫມາຍອັນດຽວກັນ.

    ສໍາລັບກິດຈະກໍາຄັ້ງນີ້ ປະກອບມີນັກຮຽນຂຶ້ນປະຕິຍານຕົນວ່າຈະເປັນຄົນຮຸ່ນໃໝ່ ທີ່ຈະປະຕິບັດກົດຈະລາຈອນທາງບົກຢ່າງເຂັ້ມງວດ ພ້ອມທັງປ່ອຍຂະບວນລົດເພື່ອສາທິດການໃສ່ສາຍຮັດນິລະໄພ ຈາກເດີ່ນພະທາດຫຼວງ-ວົງວຽນໂພນເຄັງ-ຫໍຄໍາ ກັບຄືນເດີ່ນພະທາດຫຼວງ ມີລົດ 20 ຄັນ ລົດເມ 4 ຄັນ ລົດ LOCA 3 ຄັນ ລົດກູ້ໄພ ລົດດັບເພີງ ແລະ ລົດແທ໋ກຊີ ພ້ອມທັງຢ້ຽມຊົມຮ້ານວາງສະແດງສິນຄ້າຂອງບັນດາຕົວແທນບໍລິສັດທີ່ໃຫ້ການສະໜັບສະໜູນ ແລະ ການໂຕ້ວາທີກ່ຽວກັບການຂັບຂີ່ປອດໄພຕ້ອງໃສ່ສາຍຮັດນິລະໄພ ເພື່ອຮັບຂອງຂວັນລາງວັນອີກດ້ວຍ.

ໜັງສືພິມຽງຈັນໃໝ່

# ຂ່າວ & ພາບ: ສີພອນ

ຄົ້ນຫາ

ປະຕິທິນ

July 2021
S M T W T F S
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 4

ຈຳນວນຜູ້ເຂົ້າຊົມວານນີ້ 18

ຈຳນວນຜູ້ເຂົ້າຊົມອາທິດນີ້ 249

ຈຳນວນຜູ້ເຂົ້າຊົມເດືອນນີ້ 1033

ຈຳນວນຜູ້ເຂົ້າຊົມທັງໝົດ 83597

Currently are 14 guests and no members online